لو في أكلة بتجمع العيلة كلها على السفرة من غير ما حد ينادي، فهي المكرونة بالبشاميل 😋
ريحة الفرن وهي شغالة، ووش المكرونة الدهبي… أكلة تحس إن فيها دفء البيت كله.
المكونات:
-
نص كيلو مكرونة قلم
-
نص كيلو لحمة مفرومة
-
بصلة كبيرة مفرومة ناعم
-
ملح وفلفل أسود
-
رشة بهارات لحمة
-
معلقة زيت أو سمنة
للبشاميل:
-
4 معالق كبيرة زبدة
-
4 معالق كبيرة دقيق
-
لتر لبن دافي
-
ملح وفلفل أبيض
-
رشة جوزة الطيب (اختياري بس بتفرق)
الطريقة:
نبتدي بالمكرونة، نسلقها في مية فيها ملح كويس، ونطلعها أل دينتي يعني مش مستوية زيادة، ونسيبها على جنب.
في طاسة على النار، نحط الزيت أو السمنة ونشوح البصلة لحد ما تدبل وتبقى دهبي، ننزل باللحمة المفرومة ونقلب كويس لحد ما تستوي. نضيف الملح والفلفل وبهارات اللحمة ونقلبها تقليبتين حلوين ونطفي النار.
نخش على نجم الحكاية… البشاميل
في حلة على نار متوسطة نحط الزبدة، أول ما تسيح نضيف الدقيق ونقلب بسرعة من غير ما يتحمر. نبتدي نضيف اللبن واحدة واحدة مع التقليب المستمر عشان ما يكلكعش. لما الصوص يتقل، نضيف الملح والفلفل الأبيض وجوزة الطيب ونقلب لحد ما يبقى ناعم وكريمي.
التجميع:
نجيب صينية، نحط طبقة بشاميل، بعدها نص كمية المكرونة، وفوقها اللحمة، وبعدين باقي المكرونة، ونغرق الكل بالبشاميل.
ممكن نرش وشها شوية فلفل أو جبنة لو حابة.
ندخلها فرن سخن على 180 درجة حوالي 30–40 دقيقة لحد ما الوش يحمر ويبقى لونها يفتح النفس.
وتطلع من الفرن… طبق مكرونة بشاميل يستاهل التصوير قبل الأكل 😄
أكلة بسيطة، بس طعمها دايمًا يحسسك إنك في عزومة مش في يوم عادي.
كتبت بقلم :اسماء محمد /منه محمد /خالد محمد